المياه هي مصدر الحياة، ومع دخول الصيف وإرتفاع درجة الحرارة، بيزيد إحتياج الجسم للماء. وأهم حاجة في المياه هو إنها تكون نقية وإنها تكون بتوفر للجسم احتياجاته، لكن للأسف مع ازدياد التلوث، المياة النقية مبقتش في متناول الجميع وأصبح أغلبنا بيلجأ للمياة المعدنية كمصدر موثوق فيه لأن مياه الحنفية مبقاش طعمها و ريحتها حلو.
الحقيقة ان حل المياه المعدنية قد يكون عملي أثناء وجودنا خارج البيت لسهولة شراء زجاجة مثلجة أو أكثر (حسب الحاجة) ولتوفرهم في تقريباً كل المحلات والأكشاك لكن لو جينا نفكر في مدى عملية الإعتماد على المياة المعدنية في الإستخدام المنزلي، هنلاقي إن الموضوع مكلف جداً، ده بالإضافة لصعوبة التخزين سواءاً اشترينا كراتين زجاجات مياه معدنية أو جبنا كولدير ومعاه الجالونات المخصصه له غير كل ده، في دراسات أثبتت إن مياه الحنفية أفضل للجسم، خصوصاً للناس اللي بتعاني من صعوبة التعامل مع الأملاح، وده بيسبب خشونة في المفاصل و مشاكل في الكلى!!
عشان كده، هنتكلم معاكم هنا عن أنواع فلاتر المياه المتوفرة في السوق المصري و الفروق بينهم علشان تقدروا تحددوا النوع اللي يناسب إحتياجاتكم.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
أهم حاجة لما تيجوا تختاروا نوع فلتر المياه اللي هتشتروه هو إنكم تحطوا في إعتباركم العوامل الآتية:
الكمية والإستخدام: بتستهلكوا مياه قد إيه و ده ممكن يتحدد بعدد أفراد الأسرة، أما بالنسبة للإستخدام، فهل محتاجين مياه نقية للشرب فقط ولا للطهي.
مصاريف التركيب: نوع السباكة المتوفرة في المطبخ هتحدد مكان تركيب فلتر المياه وبالتالي نوعه، فيُفضل قبل ما تشتروا الفلتر اللي هتختاروه تتأكدوا من توافق حالة السباكة ومن إن التعديل المطلوب لتركيب فلتر المياه مش هيكون أكثر تكلفة من الفلتر نفسه.
الصيانة: قبل شراء فلتر المياه، تأكدوا إن صيانته غير مكلفة وإن قطع غياره متوفرة في السوق ومقبولة السعر.
تقريباً كل أنواع الفلاتر بتستخدم الكربون اللي بيمتص الشوائب والروائح الكريهة للكلورين، لكن في أنواع بتعتمد على وسائل تنقية أكثر تعقيداً لضمان نقاء أعلى.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
أنواع فلاتر المياه:
إبريق تصفية المياه
النوع ده بيمثل أبسط طُرق تنقية المياه وتصفيتها من الشوائب والعوالق، وده بيكون عن طريق ملء إبريق الماء المُخصص بمياه الصنبور وغمر خرطوشة الفلتر المليئة بمادة الكربون فيه وتركها مدة ليمتص الكربون المواد الكيماوية الضارة والطعم والرائحة الكريهة وطبعاً الشوائب والرواسب العالقة بالمياه.
مميزات النوع ده إنه الأرخص، وسهل التنضيف، ولا يحتاج لأي مصاريف تركيب
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الصنبور المُرشِح للمياه
ده نوع فلتر مياه بيكون عبارة عن خرطوشة الكربون المخصصة تنقية المياه بتتركب على حنفية المياه وبتقوم بترشيح المياه أثناء إستخدام الصنبور، وبيكون فيها حنفية صغيرة أو محول لتغيير مسار الماء حسب الحاجة لمياه نقية من عدمه (في حالة غسيل المواعين مثلاً).
مميزات النوع ده إن فكرته بسيطة وبنفس فاعلية النوع اللي قبله لكن مع تنقية كمية أكثر من المياه، وبرضه من غير أي مصاريف تركيب لأنه بيتركب على حنفية المطبخ.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مُرشحات الكاونترتوب
الفلتر ده بيتعمله توصيلة من ماسورة المياه اللي بتمد حنفية الحوض بالماء البارد وبيكون ليه صنبور خاص للمياه النقية منفصل عن الصنبور الرئيسي للمطبخ. عملية ترشيح المياه بتتم بداخل الفلتر اللي بيكون بداخله خرطوشة كربون بيتم تغييرها كل فترة كما هو المتبع مع أنواع فلاتر المياه السابقة، ولكن خرطوشة النوع ده بتستمر مدة أطول.
مميزات النوع ده إن تركيبه ملائم لأكثر أنواع السباكة وإن يعتبر أقل في تكلفة التركيب بالمقارنة، وكمان النوع ده مبيتسدش زي الأنواع السابقة، وبيوفر كمية مياه نقية أكثر من غيره، ده بالإضافة لإن صيانته سهلة ولإن خرطوشة الكربون (الشمعة) متوفرة.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مرشحات تُركب تحت الحوض (Undersink)
كما هو واضح من الإسم، فلاتر المياه ده بتتركب تحت الحوض و بتتوصل بصنبور مياه منفصل عن الصنبور الرئيسي، وعادة بيُستخدم التناضح العكسي (reverse osmosis) لتنقية المياه على كذا مرحلة بعد الترشيح بالكربون، ودا بيضمن مياه أنقى من كل المعادن الثقيلة والأملاح الضارة.
مميزات النوع ده هو انه مش بيزحم المطبخ بما انه بيتركب في المكان الأقل استخداماً، وطبعاً كما هو موضح بيوفر أعلى نسبة تنقية للمياه.
نتمنى تكون استفادت معانا ومتنساش تشاركنا برأيك قبل ما تمشي .